பனியில் சில்லிடும் மண்ணில்
பதியும் பாதங்களுக்கு
குளிர்ச்சியைத் தாங்கும்
வலிமையைத் தருகிறது
முகத்தில் அறையும்
மார்கழிக் காற்றின்
குளிரைத் தாண்டி
அதன் நறுமணம் தேட விழைகிறது
குரைக்கும் நாயைப் பொருட்படுத்தாது
வீரனைப் போல வீதியில்
விரையும் உறுதியைத் தருகிறது
எல்லா சத்தங்களில் இருந்தும்
அதன் தனித்த சத்தத்தை
பிரித்துணரும் நுண்மையைத் தருகிறது
நாசியில் நறுமணமும்
வாழ்வின் கட்டுகளிடமிருந்தும்
கண நேரமாவது விடுதலையும் தருகிறது காப்பி
எப்படியாகினும்
அடிமைத்தளையிலிருந்து விடுபடும் எல்லாவற்றிலும்
இனிப்போடு கசப்பும் கலந்து விடுகிறது
வெள்ளைநிறப் பாலும் சர்க்கரையும்
அடர்பழுப்பு நிறக் காப்பித் தூளும்
இணைந்து பிறந்த
கரியநிறக் சமத்துவக் குழந்தை
அழகாய்ச் சிரித்து
ஆரவாரமாய் பவனி வருகிறது
பலரின் இதழ்க் கடையோரம்
இருமுறைக்கு மேல் அருந்தும் போது
குற்றவுணர்வுடனேயே சுவைக்க முடிகிறது
வேலையிடையே வரும் தூக்கம் போல
எப்போதும்மே காபி அருந்துவதில்லை
என்பதெல்லாம் நல்ல பழக்கங்களில்
தவறாமல் இடம்பெற்றுள்ளது
கண நேரமாவது பிரச்சனைகளில்
இருந்தும்
விடுபட வரமளிக்கும்
காப்பி கடைகளின் மரபெஞ்சுகள்
யாவையும்
மனநல மருத்துவமனையாகவும்
அறியப்படுகின்றன
காப்பியின் முதல் மிடறு அருந்தி
கண்களை மூடி ரசிக்கும்
அனைவரிடமும்
புத்தரின் ஞானம் ஒளிர்கிறது
மலையிடை உதித்து
தரை வரும் கோகோ
பீபரிக் கொட்டைகள்
ஆவின் மடியில் உதித்து
கலம் சேரும் பசும்பால்
வயல்வெளியில் உதித்து
கன்னல் சக்கையில்
பிறப்பெடுக்கும் சர்க்கரை
குறிஞ்சி, முல்லை, மருதம்
மூன்றின் இணை தயாரிப்பு
மண், தீ, நீர், காற்றின் கூட்டணி
காப்பி உலக ஒருமைப்பாட்டின் சின்னம்
அமைதியின் அடையாளமாய்
கோப்பையில் குடியிருக்கும் இன்பம்
மொழிகளற்ற கைக்குலுக்கல்
உதட்டு முத்தங்கள் சேகரிக்கும்
திரவப் பெட்டகம்
பல வேளைகளில் உணவுக்கு மாற்று
தண்ணீருக்கும் மணமும் குணமும் சேர்க்கும் மந்திரம்
காபி கோப்பைகள்
நிறையும் போதெல்லாம்
காலியாகி விடுகிறது மனது
கருத்துகள் இல்லை:
கருத்துரையிடுக