என் நாடு - கவிதை

 

 

மே2021 வல்லின சிறகுகள் இதழில் என்னுடைய கவிதை. முழுக் கவிதை கீழே.

வல்லின சிறகுகள் மே மாத இதழை வாசிக்க கீழே சொடுக்கவும்.

 

 https://tinyurl.com/5c28h22h

 

என் நாடு 

 

மகளுக்கு மணம் முடிக்கவென்று
பல வருடமாய் மண் பானைக்குள் சேர்த்த
சிறுவாட்டு காசு செல்லாதென்றே
கனவு கலைத்தது என் நாடு

ஆசையாய் வளர்ந்த பெண்ணே
ஆறு மணிக்கு மேலெங்கும் போகாதே கண்ணே
வீட்டுச் சிறையில்  கால் விலங்கிட்டு
பெண்ணுரிமை பேணுது என் நாடு

ஊரையே கொள்ளை அடித்து
பணத்தால் நீதியை வெள்ளை அடித்து
வெள்ளை உடையும் கறுத்த மனமும் கொண்டோரை
தலைவாவென்றது என் நாடு

கனிம வளம் கார்ப்பரேட்டுக்கு
நீர்வளம் குளிர்பான நிறுவனத்துக்கு
நாசகர திட்டத்தை எதிர்க்கும் அப்பாவிக்கு
தோட்டாக்களை பரிசளிக்கிது என் நாடு

நிறத்தால் ஒருவனை உயரே வைத்து
குலத்தால் பலரை அடிமை செய்து
சாதி மதம் என்று பிரித்து வைத்து
வேற்றுமையில் ஒற்றுமையென்று 

முழங்கியது என் நாடு

எத்தனை எத்தனை உயிர் பலிகள்
பெற்ற சுதந்திரம் பாழ் செய்து
பொருளீட்ட தீயறம் செய்து
பாருக்குள்ளே நல்ல நாடென்று 

பழம்பெருமை கொள்ளுது என் நாடு

உலகின் பெரு ஜனநாயகமாம்
வோட்டும் இங்கே விலை போகுமாம்
வோட்டளி, உரிமை பேசாதே
உயிருடன் இரு, நீதி கேட்காதே
போதை கொள், சிந்திக்காதே
சொல்வதைப்படி, வேலை கேட்காதே
ஆடை தரி, மரியாதையை எதிர்பாராதே
கையைத் தட்டு, காரணம் கேட்காதே
கடமையை செய், பலனை எதிர்பாராதே
கீதையின் சாரமாய் வாழுது என் நாடு