மூன்று வேளை சமையல்
காப்பி டீ நொறுக்குத் தீனியென
அனைவரின் பசியாற்றியபின்
கிடைப்பதே
அவளுக்கான ஓய்வு
சரியான சம்பளம்
நியாயமான சலுகைகள்
நல்ல மேலாளர்
இல்லாத இடமே
அவளுக்கான பணியிடம்
பிள்ளைகளை நன்றாக வளர்
அனைத்திலும் அவர்களை முதல்வனாக்கு
கணவனை நன்கு கவனி
அவளுக்கான சுயமுன்னேற்றக் குறிப்புகள்
துணிகளைத் துவை
சமையலில் ஆற்றல் பெறு
வீட்டைப் பார்த்துக் கொள்
அவளுக்கான சொத்துக் குவிப்பு
வயதானது போலத் தெரிகிறது
எடை போடாமல் பார்த்துக்கொள்
நரை விழற வயசா இது
அவளுக்கான கரிசனப் பேச்சு
குடும்பத்தின் தேவைகளை முன்வைத்து
அவள் ஆசைகளைப் புறம் தள்ளுவதே
அவளுக்கான காதல் பரிசு
சாப்பிட்டியா என்பதே
அவளுக்கான அதிகபட்ச அன்பு
விரைவில் உடல்நலம் தேறி
குடும்பத்தை பார்த்துக்கொள் என்பதே
அவளுக்கான அதிகபட்ச அக்கறை
அசதி சோர்வு உடல்வலி பொறுத்து
வேலைகள் பலவும் முடித்து
உணர்வாலும் உழைப்பாலும் களைத்து
வருடமும் வயதும் மறந்து
நடைபிணமாய் வாழ்வதே
அவளுக்கான கனவு வாழ்க்கை
கருத்துகள் இல்லை:
கருத்துரையிடுக